Қарагөз рөлін сомдаған театрдың жас дарынды актрисасы М. Өсербаева «Ең үздік әйел рөлі» номинациясын қанжығасына байлады.

2018 жылдың 15-желтоқсанында Петропавл қаласында Тәуелсіздік күні мерекесі қарсаңында облыстық салтанатты жиын өтті.
Сахнада Самал Еслямова мен С.Мұқанов атындағы қазақ сазды-драма театрының әртістері Абай Құнанбаевтың «Желсіз түнде жарық ай» әнін орындады.
Сондай-ақ, жиын барысында облыс әкімі Құмар Іргебайұлы Ақсақалов жұртшылықты мерекемен құттықтап, мемлекеттік наградаларды табыстады.
Облыс әкімі ҚР Президентінің жарлығымен театр директоры Біржан Жалғасбаевты «ҚҰРМЕТ» Орденімен марапаттады.
Қазақстан Республикасы Президентінің Жарлығымен белгіленген «Құрмет» Орденімен азаматтар экономиканы, әлеуметтік саланы, ғылым мен мәдениетті, бiлiмдi дамытуға сіңірген еңбектері үшін, мемлекеттік органдардағы үлгілі қызметі және белсенді қоғамдық қызметі үшін марапатталатынын атап өту жөн болар.

Елбасының «Ұлы даланың жеті қыры» атты мақаласы талқыланды
22-қараша күні С.Мұқанов атындағы қазақ сазды-драма театрында Елбасы Н.Ә.Назарбаевтың "Ұлы даланың жеті қыры" атты мақаласын талқылауға арналған отырыс өтті.
Театр директоры Біржан Жалғасбаевтың басшылығымен өткен жиынға әртістерден бастап техникалық мамандарға дейін түгелдей қатысып, сиясы кеппеген мақалада айтылған өзекті мә¬селелер жөнінде ойларын ортаға салды.
Жиынды ашқан Біржан Жалғасбаев: "Ұлттың жаңғыруы мен рухани дамуына себепші болатын мақалада айтылған ойлар ұлт санасын оятып, болашақта үлкен істерге жол ашады. Ал біздің мақсатымыз - сахна өнері арқылы ата-бабаларымыздан қалған асыл мұраны дәріптеу. Сол себепті Елбасының даналы бастамасын қолдап, бірқатар жоспарлар жөнінде ақылдасайық", - деді өз сөзінде.
"Тарихтың кино өнері мен телевизиядағы көрінісі" мәселесіне ерекше көңіл бөлінді. Бұл тұрғыда театр актерлері Асылхан Разиев пен Дәурен Тойбазаров ұсыныстарын білдірді.
Отырыс соңында театр ұжымы мақаладағы бола¬шақ¬қа бастайтын идеяларды қолдауға байланысты барлық ұсыныстарды топтастырып, жобаларды әзірлейтінін жеткізді.

Театр ұжымы Семей қаласында өткен Әмина Өмірзақованың 100 жылдығына арналған Қазақстан драма театрларының ХХVІІ республикалық фестиваліне, Б.Жақыптың «Жан дауысы» soundrama жанрындағы спектаклін ұсынып, «Үздік режиссура» номинациясымен Ф. Молдағали марапатталды.

2018 жылдың 12-13 желтоқсанында "Пайдалы орын" қойылымының премьерасы өтті.
Авторы - А.Н.Осторвский;
Қоюшы режиссер – Баатырбек Шамбетов;
Суретші - Садыр Ниязакунов.
Мықты режиссерлік жұмыс, тамаша актерлік ойын, тартымды сюжет және керемет юмор - осының бәрін бір арнаға тоғыстырған қойылым көрерменнің көңілінен шықты.
Бірнеше ай бойы театр ұжымы тынбай еңбетеніп, дайындаған комедия жанрындағы спектакль жиналған қауымды біраз күлдіртті, алайда, көрерменге ұсынылған қойылымның астарында үлкен мән-мағына мен терең ой жатыр. Заман дерті саналатын сыбайлас жемқорлықты әшкерелеу, оның қоғамға кері әсері, залалы туралы жазылған шығарманың астарлы ойын театр ұжымы сахна өнері арқылы халыққа жеткізді.
Премьераны тамашалауға келген көрермендердің көңіл-күйіне қарасақ, режиссер мен актерлердің еңбегі еселеп ақталғандай.

16-қараша күні Өскемен қаласында өткен Республикалық фестивальде "Шолпанның күнәсі" қойылымы бас жүлде ұтып алуына, Талдықорғандағы Халықаралық фестивальде "Қарагөз" қойылымы "Классиканың үздік заманауи интерпретациясы" номинациясымен, театр актрисалары Аида Супатаева мен Мадина Өсербаева номинациялармен марапатталуына орай театрымызда БАҚ өкілдерінің қатысуымен пресс-конференция өтті.
Конференцияға театр директоры Біржан Жалғасбаев, режиссер Баатырбек Шамбетов, "Шолпанның күнәсі" және "Қарагөз" қойылымдарында рөлдерді сомдаған әртістер қатысты.
Аталмыш жиынның басты мақсаты - халықпен қуанышты хабарларымызды бөлісу.
Пресс-конференцияда жоғарыда аталған қойылымдардың сюжеті, режиссердің айтқысы келген ойы, кейіпкерлердің бейнесі, екі фестиваль барысы, дайындықтар, театрдың болашақтағы жоспарлары туралы сұрақтарға жауап берілді.
Іс-шара аяқталған соң, Өскемен қаласында қарашаның 10-ы мен 14-і аралығында өткен Рүстем Есдәулетов атындағы ІІ республикалық театр фестивалінде бас жүлдегер атанған "Шолпанның күнәсі" қойылымы сахналанды.
Жиналған өнерсүйер қауымның қарасы қалың болып, спектакль соңында көрермендер орындарынан тұрып, қошемет көрсетті.

Театр ұжымы Семей қаласында өткен Әмина Өмірзақованың 100 жылдығына арналған Қазақстан драма театрларының ХХVІІ республикалық фестиваліне, Б.Жақыптың «Жан дауысы» soundrama жанрындағы спектаклін ұсынып, «Үздік режиссура» номинациясымен Ф. Молдағали марапатталды.

Театрдың көркемдік жетекшісі лауреат атанды

2018 жылдың 12-желтоқсанында С.Мұқанов атындағы қазақ сазды-драма театрының көркемдік жетекшісі Фархад Молдағали "Театр және кино" номинациясы бойынша "Дарын" мемлекеттік жастар сыйлығының лауреаты атанды.

С.Мұқанов атындағы қазақ сазды-драма театрының әртістері режиссер Баатырбек Шамбетовтың бастауымен Өскемен қаласында қарашаның 10-ы мен 14-і аралығында өткен Рүстем Есдәулетов атындағы ІІ республикалық театр фестивалінде "Шолпанның күнәсі" қойылымымен өнер көрсеткен болатын.
Республикалық фестивальде М.Жұмабаевтың «Шолпанның күнәсімен» өнер көрсеткен әртістер үлкен олжамен оралды. «Шолпанның күнәсі» қойылымы «Үздік спектакль» бас жүлдесімен және 1 млн теңгелік сертификатпен марапатталды.
Ұзақ уақыт бойы дайындалған театр ұжымының еңбегі жоғары бағалануы бізді қуантады әрі жаңа жетістіктер мен бұдан да зор жеңістерге ынталандырады.

С.Мұқанов атындағы қазақ сазды-драма театрында балаларға арналған жаңажылдық дәстүрлі ертеңгіліктер болды. Ертеңгіліктер желтоқсанның 20-30 аралығында өтті.
Мерекеде балаларға көтеріңкі көңіл–күй сыйлау мақсатында театр актерлері аңдардың бейнесін сомдап, ертегі әлемінен қойылым сахналады.
Ең алдымен кішкене балақайларға "Ханзада мен мысық" атты жаңажылдық ертегісі ұсынылып, қойылым барысында балалар кейіпкерлермен бірге ертегі әлеміне саяхат жасап, олармен сөйлесіп, қызықты диалог құрып, мәз-мейрам болып, кеш қызығына батты.
Бүгінгі заманның жаңа технологиялары - гироскутерді, роликті, самокатты қолдану ертегі-қойылымның бояуын қалыңдата түсті.
Кейін жаңажылдық жасыл шырша жағылып, кештің басты қонағы - Аяз ата мен Ақшақар да келіп жетті. Түрлі ойындар ойнатылып, байқаулар ұйымдастырылған бұл сиқырға толы кеште тәттілер мен сыйлықтар да болды.
Бірі-супермэн, бірі-өрмекші адам, енді бірі-ханшайым болып ертегілер еліндегі кейіпкерлерге ұқсап киінген бүлдіршіндер жаңажылдық кешке ерекше сән беріп, құлпыртып жіберді.
Би билеп, ән шырқаған балалар уақыттың қалайша тез зымырап өткенін де сезбей қалғандай.

Сыбайлас жемқорлықпен күрес - бүгінгі таңда Қазақстандағы күрделі әрі маңызды мәселелердің бірі.
6-желтоқсан күні С.Мұқанов атындағы қазақ сазды-драма театрында "Ісіңе адал бол" атты сыбайлас жемқорлыққа қарсы күрес тақырыбында отырыс өтіп, театр қызметкерлеріне түсіндіру жұмыстары жүргізілді.
Іс-шара барысында театр қызметкерлеріне ҚР Сыбайлас жемқорлыққа қарсы іс-қимыл туралы ҚР Заңында көрсетілген ережелер мен қағидаттар жөнінде, жалпы сыбайлас жемқорлықпен күресу туралы ақпарат берілді.
Бұл орайда желтоқсанның 12-сі театрымызда сыбайлас жемқорлыққа қарсы күрес тақырыбында А.Н.Осторвскийдің "Пайдалы орын" атты қойылымы көрерменге жол тартпақ. Спектакльге дайындық өте қызу жүріп жатыр.

Форум аясында қонақтарды қазақ халқының мәдениетімен етене таныстырған қойылымдар
Петропавл қаласында үстіміздегі жылдың 8-9 қарашасында Қазақстан үшін маңызды шаралардың бірі – Қазақстан мен Ресей арасындағы XV өңіраралық ынтымақтастық форумы өткізілген болатын.
Театрымыз да аталмыш форумға қатысып, шетелдік меймандарды қазақ халқының мәдениетімен таныстыруға мүмкіндік алды. Форум аясында М.Әуезовтың «Қарагөзі» мен М.Жұмабаевтың «Шолпанның күнәсі» қала тұрғындары мен қонақтарына ұсынылды.
Жиналған қауымның қарасы қалың болып, аталмыш қойылымды тамашалау үшін форумға келген қонақтар мен басқа ұлт өкілдерінің келуі бізді ерекше қуантты. Бұл орайда оларға арнайы құлаққаптар табысталып, қойылым кезінде орыс тіліне синхронды аударма жүргізіліп отырды.
Спектакль соңында автордың айтпақ ойын актерлік шеберлік арқылы жеткізген театр актерлеріне халық орындарынан тік тұрып, қошемет көрсетті.
Жұртшылықтың жанарларын жуған мұң тамшылары қойылымдардың әсерлі де әдемі, сәтті өткенін тағы бір мәрте дәлелдегендей.

2018 жылдың 16-желтоқсанында С.Мұқанов атындағы қазақ сазды-драма театрында Қазақстан Республикасының Тәуелсіздік күніне арналған "Тәуелсіздік бабалардың арманы" атты мерекелік концерт өтті.
Еліміздің барлық қиындықтарды жеңіп, әлемдік сахнаға көтерілуінің дәлелі сол - мәз-мейрам болып, Ұлы күнді жыл сайын тәуелсіз, тыныш, кең байтақ жерімізде атап өтеміз.
Бостандық пен еркіндіктің бастауы болып табылатын осы салтанатты күні театр ұжымы да көрермендерін мерекемен құттықтап, керемет сазды кеш ұсынды.
Театр әртістері, би ансамблі, дирижер Марат Жакуповтың жетекшілік етуімен кіші симфониялық оркестр зал лық толы жиналған қауымға өнер көрсетті. Өнерпаздар ұлттық рухты көтеретін, патриоттық сарындағы әндер шырқап, мың бұрала би билеп, күмбірлеткен күйлерінен сусындатты.
Осылайша сахна төрінде өнер көрсеткен шығармашылық ұжым бейбіт өмір сыйлаған батырларға алғысын жеткізгендей.

Тұңғыш Президент күнін ұлықтауға арналған мәдени кеш өтті
Желтоқсанның 2-сі күні С.Мұқанов атындағы қазақ сазды-драма театрында ҚР Тұңғыш Президенті күніне арналған "Елбасы - Ел тірегі" атты мерекелік концерт өтті.
Сазды кешке театр ұжымы белсене қатысып, театр әртістері, дирижер Марат Жакуповтың жетекшілік етуімен кіші симфониялық оркестр сахнада өнер көрсетті.
Концерттік бағдарламаның мәні мен сәнін келтірген әуелеткен әндер, күмбірлеген күйлер мен әдемі билер - осының бәрі көрерменге ерекше көңіл-күй сыйлап, шаттыққа бөледі. Нағыз қазақ – қазақ емес, нағыз қазақ – Домбыра!» дегендей, қазағымыздың домбырасымен әсем әндерден де шашу шашылды.
Жаңа Қазақстанның тарихындағы ерен еңбегі үшін Елбасына деген ел құрметін айрықша айғақтап, Тұңғыш Президент күнін ұлықтауға арналған бұл мәдени кешке жиналған қауым сахнада өнер көрсеткен әртістерге ыстық ықылас пен жылы лебіздерін білдіріп, қошемет көрсетті.
Қарасы қалың халық өнер кешінен көтеріңкі көңіл-күймен тарады.

Үстіміздегі жылдың 30-қазан мен 6-қараша аралығында Талдықорған қаласында өткен Астананың 20 жылдығы мен көрнекті мемлекет қайраткері Темірбек Жүргеновтің 120 жылдығына арналған VII Орталық Азия елдерінің халықаралық фестиваліне C.Мұқанов атындағы қазақ сазды-драма театры «Қарагөз» soundrama жанрындағы қойылымымен қатысты.
Аталмыш театр фестивалі Талдықорғанда жаңадан салынған 510 орындық театрдың ашылуымен тұспа-тұс келуі театр өнерін бағалайтындар мен сүйетіндер үшін, тіпті, керемет жаңалық болды. Театрдың салтанатты ашылуына театр директоры Біржан Жалғасбаев қатысып қайтты. Фестивальде бақ сынауға келген Қазақстан, Қырғызстан, Түрікменстан, Башқұртстан, Өзбекстан, Түркия елдерінің бас театрлары таңғажайып жаңа театрдың сахнасында өнер көрсетті.
Фестиваль көрермендеріне 5-қараша күні теарымыз режиссер Фархад Молдағалидің жетекшілігімен сахналанған қазақ классикасының алтын қорына айналған М.Әуезовтың "Қарагөзін" заманауи soundrama жанрында ұсынды. Осылайша, фестивальдің қорытындысы бойынша, С.Мұқанов атындағы қазақ сазды-драма театрының "Қарагөз" спектаклі "Классиканың үздік заманауи интерпретациясы" номинациясымен марапатталып, Алматы облысы әкімінің арнайы сыйлығы – 1 млн теңгелік сертификаттың иегері атанды. Сонымен қатар, театрымыздың қос аруы Аида Супатева Мөржан рөлі үшін «Ең үздік екінші пландағы әйел бейнесі» номинациясымен және 250 мың теңгелік сертификатпен, Мадина Өсербаева Қарагөз рөлі үшін «Үміт» номинациясымен және 100 мың теңгелік сертификатпен марапатталды.